काठमाडौं- नेपाल आयल निगमले हवाई इन्धनको मूल्य प्रतिलिटर २० रुपैयाँ बढाएपछि आन्तरिक हवाई उडानको भाडा पनि बढेको छ। नेपाल नागरिक उड्डयन प्राधिकरणले फ्युल सरचार्ज संशोधन गर्दै मङ्गलबारदेखि नयाँ भाडादर लागू गरेसँगै जहाज तथा हेलिकोप्टर दुवैको भाडा महँगिएको हो। नयाँ व्यवस्थाअनुसार यात्रुले हवाई टिकट खरिद गर्दा भाडासँगै इन्धन शुल्क पनि तिर्नुपर्ने हुन्छ। आयल निगमले इन्धनको मूल्य समायोजन गरेसँगै सोहीअनुसार फ्युल सरचार्ज बढ्ने वा घट्ने व्यवस्था रहेको छ।
संशोधित भाडादरअनुसार सबैभन्दा धेरै काठमाडौं-धनगढी रुटमा ८८० रुपैयाँले भाडा बढेको छ। त्यसपछि काठमाडौं-पर्वतीय उडानमा ६८५ रुपैयाँ, काठमाडौं-नेपालगञ्जमा ६५५ रुपैयाँ, काठमाडौं-भद्रपुरमा ६०५ रुपैयाँ, काठमाडौं-विराटनगरमा ४८० रुपैयाँ, काठमाडौं-भैरहवामा ४१० रुपैयाँ, काठमाडौं-पोखरामा ३१५ रुपैयाँ, काठमाडौं-जनकपुरमा २६० रुपैयाँ र काठमाडौं-सिमरामा १८० रुपैयाँले टिकट महँगिएको छ।
